Fragment
Dit is de eerste zitting in dit boekje:
Item anno etc. LXXVIo ’s manendaigs post Pancraci sat Johan van Rossem amptman van Nederbetuwe tot Kesteren to gericht mijt gerichtzluijde Wijlhem van Wije, Ailbert van Bemmel, Ghijsbert van Randwijck etc.
Item opten selve dach Huijbert van Rienen einen willigen noitsijnne avergegeven tegen brueder Herman van Ewijck.
Item thenselven maill op aensprak Aerntz die Ruijter antwoirt Jan van Heze ende Herman van Zandwijck mijt Gijsbert van Randwijck oeren voirspreke ende Gijsbert vurschreven als een voirspreke sijns selfs. Ende seggen dat Aernt vurschreven die briefs dair hij mede sprickt ende in ’t gericht hefft laiten lesen mijt recht hem nijet gemechticht en is mijtten wilbrieff den hij dair op hefft laiten lesen, om reden will want den princepaillbrieff vurschreven inheldt dat Henrick Adelijen den enen anderen verwillen mach ende nijet dattet sijn erven off ijemant anders doin mach. Dairom soe hefft Aernt vurschreven een onrechte peijndinge gedaen ende sij een rechte pandweringe. Ende seggen dattet recht is op oeres rechte voirordell, beheltlick hem oerer antwoirt, hoirs bewijs ende gueden rechten, dair sij toe gewesen warden moigen.
Item sij seggen voirt, dattet lant daer Aernt vurschreven aen gepeijnt hefft oir is ende nijemant anders, dat sij waill bewijsen kunnen als ’t hem van noden wesen sall. Want datselve lant geheell ende all sonder middell avermijtz Wilhem van Gent, die doe ter tijt een amptman van Averbetu was, gewonnen is mijtten lantrecht van Nederbetu voir alsulck gelt als die gerichtlick verwijnbrieff dat claerlicken inheldt ende waell uijtwijsen sall. Avermijtz welcken verwijnbrieff, insettzbrieve ende andere brieve Johan, Herman ende Gijsbert vurschreven gecomen sijn totten vurschreven landen, alsoe dat Aernt vurschreven off nijemant anders dan sij alleen ennijch recht off toeseggen en hebben aen den vurschreven landen, dair Aernt vurschreven peijndingh aen gedaen hefft. Ende seggen dairomdat Aernt vurschreven een onrechte peijndinge gedaen hefft ende sij een rechte pandweringe. Ende seggen dattet recht is, oick op oeren rechte voirordell. Beheltlick hem all oirs gueden rechten, bewijs, betoen ende proven, dair sij toe moigen gewesen warden te doin in tijden ende wilen hem dis noit wesen sall.
Die ordelen vurschreven bestaedt aen Ailbert van Bemmell, die dis sijnen verst nam ende begeerden aensprake ende antwoirt in schrifft ende die brieff dair Aernt mede sprikt waer copijen dairaff. Ende als hij dat alsoe hefft daer en theijnden neem hij sijnen verst als recht is.
Then selven maill uijtgericht ende Gijsbert van Randwijck weest ’t leste vondenisse.
×
Thuiswinkel Waarborg